നവോത്ഥാനകേരളത്തിൻ്റെ സൃഷ്ടിയിൽ സ്തുത്യർഹമായ പങ്കുവഹിച്ച ഡോക്ടർ പൽപ്പുവിൻ്റെ 161-ാം ജന്മവാർഷികം 2024 നവംബർ 1, 2 തീയതികളിൽ വിവിധ പരിപാടികളോടെ ആഘോഷിക്കുകയാണ്. സമൂഹത്തിൻ്റെ സർവ്വതോമുഖമായ ഉന്നമനത്തിനായി ആയുസ്സും വപുസ്സും ബലിയർപ്പിച്ച ത്യാഗിവര്യനായിരുന്നു ഡോക്ടർ പൽപ്പു. സ്വാമി വിവേകാനന്ദനെ കേരളത്തിൻ്റെ ജാതീയമായ ഉച്ചനീചത്വങ്ങളെക്കുറിച്ചും തന്മൂലം അവശ ജനവിഭാഗങ്ങൾ അനുഭവിച്ചു കൊണ്ടിരിക്കുന്ന വേദനകളെക്കുറിച്ചും ആദ്യമായി ബോധ്യപ്പെടുത്തുന്നത് ഡോക്ടർ പൽപ്പുവാണ്. ശ്രീനാരായണഗുരു എന്ന ആത്മീയാചാര്യനെ മുൻനിർത്തി ശ്രീനാരായണധർമ്മപരിപാലനയോഗം എന്ന മഹത്തായ സംഘടനയ്ക്ക് രൂപം നൽകി കേരളത്തെ നവോത്ഥാന പാതയിലേക്ക് നയിച്ച പൽപ്പു എന്ന മനുഷ്യസ്നേഹിയെ അടുത്തറിയാനായി സംഘടിപ്പിക്കുന്ന ഈ പരിപാടികളിലേക്ക് എല്ലാ വിദ്യാർത്ഥികളെയും നല്ലവരായ നാട്ടുകാരെയും ഹാർദ്ദമായി സ്വാഗതം ചെയ്തു കൊള്ളുന്നു